• 4 Мая 2017
  • 7043

Духовная грамота Дмитрия Донского, 1389 год

Завещание Дмитрия Ивановича Донского было составлено незадолго до смерти и фактически подвело итог целой эпохе в истории Русского государства. Великий князь московский передал княжество сыну Василию, не спрашивая разрешения у Орды. После этого московские князья решали вопросы о наследии самостоятельно. Остальным своим детям Дмитрий распорядился выделить небольшие княжения на прокорм семьи, двора и дружины. 

Во имя Отца и Сына и Святаго духа, се яз, грешный худый раб Божий Дмитрии Иванович, пишу грамоту душевную целым своим оумом. Даю ряд сыном своим и свoей княгини.


1. Приказываю дети свои своей княгине.

2. А вы, дети мои, живите заодин, а матери своее слушайте во всем.

3. А приказываю отчину свою Москву детем своим, князю Василью, князю Юрью, князю Андрею, князю Петру.

4. А брат мой, князь Володимер, ведает свою треть, чем его благословил отец его, князь Андреи.

5. А сына своего, князя Василья, благословляю на старишии путь в городе и в станех моего оудела двою жеребьев половина.

6. А трем сыном моим половина, и в пошлинах в городских половина.

7. А тамга из двою моих жеребьев княгине моей половина, а сыном моим половина.

8. А восмьничее мои два жеребья княгине моей.

9. А на старишии путь сыну моему, князю Василью, Василцево сто и Добрятиньская борть с селом с Добрятиньским.

10. А бортници в станех в городских, и конюшии путь, и соколничий, и ловчий, тем сынове мои поделятся ровно.

11. А численых людий моих двою жеребьев сыном моим по частем, а блюдут с одиного.

12. А се даю сыну своему, князю Василью, Коломну со всеми волостми, и с тамгою, и с мыты, и с бортью, и с селы, и сo всеми пошлинами. А волости коломеньские: Мещерка, Раменка, Песочна, Брашева с Селцем, з Гвоздною и с Иванем, Гжеля, Деревни, Левичин, Скулнев, Маковець, Канев, Кочема, Комарев з берегом, Городна, Похряне, Оусть-Мерьско. А из московских сел даю сыну своему, князю Василью: Митин починок, Малаховское, Костянтиновское, Жырошкины деревни, Островское, Орининьское, Копотеньское, Хвостовское, у города луг Великии за рекою. А из юрьевских сел даю сыну своему, князю Василью: своего прикупа Красное село с Елезаровским, с Проватовым, да село Василевское в Ростове.

13. А се даю сыну своему, князю Юрью, Звенигород со всеми волостми, и с тамгою, и с мыты, и з бортью, и с селы, и сo всеми пошлинами. А волости Звенигородские: Скирменово з Белми, Тростна, Негуча, Сурожык, Замошъская слобода, Юрьева слобода, Руза городок, Ростовци, Кремичня, Фоминьское, Оугож, Суходол с Ыстею, с Истервою, Вышегород, Плеснь, Дмитриева слободка. А из московских сел даю сыну своему, князю Юрью: село Михалевское, да Домантовское, да луг Ходыньскии. А из юрьевских сел ему: прикупа моего село Кузмыдемъяньское, да Красного села починок за Везкою придал есм к Кузмыдемъяньскому, да село Богородицьское в Ростове.

14. А се даю сыну своему, князю Аньдрею, Можаеск со всеми волостми, и с тамгою, и с мыты, и з бортью, и с селы, и со всеми пошлинами, и с отьездными волостми. А волости Можаиские: Исмея, Числов, Боянь, Берестов, Поротва, Колоча, Тушков, Вышнее, Глиньское, Пневичи с Загорьем, Болонеск. А Коржань да Моишин холм придал есмь к Можаиску. А се волости отъездные: Верея, Рудь, Гордошевичи, Гремичи, Заберега, Сушов, да село Репиньское, да Ивановское Васильевича в Гремичах. А Колуга и Роща сыну же моему, князю Андрею. И чтo вытягал боярин мой Федор Андреевич на обчем рете Тов и Медынь оу смолнян, а то сыну же моему, князю Андрею. А из Московских сел ему: Напрудьское село да Луциньское на Яузе с мелницею, Деоуниньское, Хвостовьское в Перемышле, да луг Боровский, а другии противу Воскресенья. А из юрьевских сел ему Олексиньское село на Пекше.

15. А се даю сыну своему, князю Петру, Дмитров со всеми волостми, и с селы, и со всеми пошлинами, и с тамгою, и с мыты, и з бортью. А се дмитровские волости: Вышегород, Берендеева слобода, Лутосна с отъездцем, Инобаш. А из московских волостии князю Петру: Мушкова гора, Ижво, Раменка, слободка княжа Иванова, Вори, Корзенево, Рогож, Загарье, Вохна, Селна, Гуслеця, Шерна городок. А из московских сел князю Петру: [Новое село, Сулиш]ин погост. А из Юрьевских сел ему прикупа моего село Богородицьское на Богоне.

16. А се даю сыну своему, князю Ивану: Раменеице з бортники и что к нему потягло, да Зверковское село с Сохоньским починком, чтo отошло ото князя от Володимера. А Сохна сыну же моему, князю Ивану. А в том оуделе волен сын мой, князь Иван, который брат до него будет добр, тому даст.

17. А се благословляю сына своего, князя Василья, своею отчиною, великим княженьем.

18. А сына своего благословляю, князя Юрья, своего деда куплею, Галичем, со всеми волостми, и с селы, и со всеми пошлинами, и с теми селы, которые тягли к Костроме, Микульское и Борисовское.

19. А сына своего, князя Аньдрея, благословляю куплею же деда своего, Белымозером, со всеми волостми, и Вольским с Шагатью, и Милолюбский ез, и с слободками, что были детии моих.

20. А сына своего, князя Петра, благословляю куплею же своего деда, Оуглечим полем, и что к нему потягло, да Тошною и Сямою.

21. А се даю своеи княгине из великого княженья оу сына оу своего, оу князя оу Василья, ис Переяславля Юлку, а ис Костромы Иледам с Комелою, а оу князя оу Юрья из Галича Соль, у князя у Оньдрея из Белаозеря Вольское с Шаготью и Милолюбскии ез. А из володимерьских сел княгине моей Оньдреевьское село, а ис переяславских сел Доброе село, и что к ним потягло. А из оудела сына своего, княжа Васильева: Канев, Песочну, а из сел Малиньское село, Лысцево. А ис княжа оудела из Юрьева: Юрьева слобода, Суходол с Ыстею, с Ыстервою, да село Оньдреевское, да Каменьское. А изo княжа оудела из Оньдреева: Верея, да Числов, да село Луциньское на Яоузе с мелницею. А из княжа оудела ис Петрова: Ижво да Сяма.

22. А что есм дал своеи княгине из оудела сына своего, княжа Васильева, и изо княжа изо Юрьева, изо княжа из Оньдреева, изо княжа ис Петрова, волости и села, а что бог розмыслит о моей княгине, и те волости и села во чьем оуделе, то тому и есть.

23. А се даю своеи княгине: свой примысл Скирменовскую слободку с Шепковым, Смоляные с Митяевским починком и з бортью, с вышегородскими бортники, Кропивну з бортники с кропивеньскими и с исменьскими, и з гордошевскими, и с рудьскими; Желескова слободка з бортью, с Ивановым селом с Хороброва, Исконьская слободка, Кузовская слободка, и что княгини моее прикуп, и что к ней потянуло, тo моеи княгине.

24. А по которая места слободьские волостели судили те слободы при мне, и княгини моее волостели судят по та же места, как было при мне.

25. А что княгини моее купля Лохно, то ее и есть. А на Коломне мои примысл Самоилецев починок с деревнями, Савельевский починок, Микульское село, Бабышево, Ослебятевское, а то княгини моеи. А что ее село Репеньское и прикуп, то ее и есть. А из московских сел даю своеи княгине: Семциньское село с Ходыньскою мелницею, да Остафьевское село, да Илмовьское. А из юрьевских сел даю ей: куплю свою Петровское село, да Фроловское, да Елох. А Холхол и Заячков, то моей княгине.

26. А что ми дала княгини Федосья Суду на Белеозере, да Колашну, и Слободку, и что благословила княгиню мою Городком да Волочком, та места ведает княгиня Федосья до своего живота, а по ее животе то княгине моеи.

27. А теми своими примыслы всеми благословляю княгиню свою, а в тех примыслех волна моя княгини, сыну ли которому даст, по души ли даст. А дети мои в то не вступаются.

28. А которые деревни отоимал был князь Володимер от Лыткиньского села княгини моее к Берендееве слободе, а те деревни потянут к Лыткиньскому селу моее княгини.

29. А по грехом, которого сына моего Бог отъимет, и княгини моя поделит того оуделом сынов моих. Которому что даст, тo тому и есть, а дети мои из ее воли не вымутся.

30. А даст ми Бог сына, и княгини моя поделит его, возмя по части у болшие его братьи.

31. А оу которого сына моего оубудет отчины, чем есм его благословил, и княгини моя поделит сынов моих из их оуделов. А вы, дети мои, матери слушаите.

32. А по грехом, отъимет Бог сына моего, князя Василья, а хто будет под тем сын мой, ино тому сыну моему княж Васильев оудел, а того оуделом поделит их моя княгини. А вы, дети мои, слушайте своее матери, что кому даст, то тому и есть.

33. А коли детем моим взяти дань на своей отчине, чем есм их благословил, и сын мой, князь Василей, возмет с своего оудела с Коломны и со всех коломеньских волостий триста рубль и сорок и два рубля, и княгини моя даст ему в то серебро с Песочны 50 рубль без 3-х, а с Канева дватцять рубль и два рубля.

34. А князь Юрьи возмет с Звенигорода и сo всех с звенигородских волостии двесте рубль и семдесят рубль и два рубля, и княгини моя даст ему в то серебро с Юрьевы слободы пятьдесят рубль, а с Суходола полпятадесять рубль, а с Смоляных 9 рубль, а с Скирменовские слободки 9 рубль.

35. А князь Оньдреи возмет с Можаиска и со всех волостии Можаиских сто рубль и семдесят рубль бес трех, а с отъездных мест семдесят рубль без дву, и княгини моя даст ему в то серебро дватцять рубль и полтретья рубля с Вереи, а с Числова полосма рубля, а с Заячкова дватцять рубль и два, с Холхла десять рубль, с Желесковы 9 рубль, с Исконьские слободки полсема рубля, с Кропивны полсема рубля.

36. А князь Петр возмет с своего оудела сто рубль и одиннатцять, и княгини моя даст ему в то серебро с Ижва тритцять рубль.

37. А князь Иван даст князю Василью с Сохны пять рубль, а с Раменеиця даст князю Петру пять рубль.

38. А то возмут в тысячю рубль, а будет бoле или менши, ино по тому розочту.

39. А переменит Бог Орду, дети мои не имут давати выхода в Орду, и которыи сын мой возмет дань на своем оуделе, то тому и есть.

40. А что есм подавал своеи княгине волости и села из оуделов детий своих, и свои примысл, и слободы, и села, и Холхол, и Заячков, а с тех волостий, и с слобод, и с сел что возмет княгини моя, то еи и есть. А дети мои в то не вступаются.

41. А ис тех волостии, и слобод, и сел, что есм вымал оу детии своих из оуделов, а подавал княгине своеи, а кому будет жалоба сиротам на волостели, и тем людем оучинит исправу княгини моя. А дети мои в то не вступаются.

42. А что есм дал сыну своему, князю Аньдрею, Заберегу, за тo дети мои вси дают оброк святому Спасу пятьнатцять рубль на год на Спасов день.

43. А се благословляю детии своих. Сыну моему старишему, князю Василью: икона Парамшина дела, чепь золота, что ми дала княгини Василиса, пояс золот велик и с каменьем без ремени, пояс золот с ременем Макарова дела, бармы, шапка золота.

44. А сыну моему, князю Юрью: пояс золот новыи с каменьем с жомчюгом без ремени, пояс золот Шышкина дела, вотола сажена.

45. А сыну моему, князю Оньдрею: снасть золота, пояс золот старыи новгородский.

46. А сыну моему, князю Петру: пояс золот с каменьем пегии, пояс золот с калитою да с тузлуки, да наплечки, да алам.

47. А сыну моему, князю Ивану: пояс золот татаоур, да два ковша золоты по две гривенки.

48. А что ся останет золото, или серебро, или иное что, но есть, то все моей княгине.

49. А что ся останет стад моих, тем моя княгини поделится с моими детми по частем.

50. А хто будет моих казначеев, или хтo будет моих дьяков прибыток мои от мене ведал, или посельских, или тиоунов, или хто женился оу тех, те все не надобе моей княгине и моим детем.

51. А приказал есм свои дети своей княгине.

52. А вы, дети мои, слушаите своее матери во всем, из ее воли не выступаитеся ни в чем.

53. А который сын мой не имет слушати свое матери, а будет не в ее воли, на том не будет моего благословенья.

54. А дети мои молодшая, братья княжы Васильевы, чтите и слушаите своего брата старишего, князя Василья, в мое место, своего отця.

55. А сын мои, князь Василии, держит своего брата, князя Юрья, и свою братью молодшюю в братьстве, без обиды.

56. А хто моих бояр имет служыти моеи княгине, тех бояр, дети мои, блюдите с одиного.

57. А хто сю грамоту мою порушит, судит ему бог, а не будет на нем милости божии, ни моего благословенья ни в сии век, ни в будущии.
А писал есм сю грамоту перед своими отци: перед игуме[ном] перед Сергием, перед игуменом перед Савастьяном.

А тутo были бояре наши: Дмитрии Михаилович, Тимофеи Васильевич, Иван Родивонович, Семен Васильевич, Иван Федорович, Олександр Аньдреевич, Федор Аньдреевич, Федор Аньдреевич, Иван Федорович, Иван Аньдреевич. А писал Внук.

Внизу грамоты на желтом шелковом шнуре привешена серебряная позолоченная печать великого князя Дмитрия Ивановича.

Кучкин В. А. Издание завещаний московских князей XIV в. // Древняя Русь. Вопросы медиевистики. 2009. № 3 (37). С. 132−136.